মুখ্য পৃষ্ঠা
06/04/25
14:52
"ক'লা মানুহ"
উদাসী গধূলি এটি আঁচলৰ আঁৰত লৈ
জোনবাই ওলাল |
জোনাকী এজাক উৰি আহি ,
চোতালৰ চাৰিও দিশে সিচঁৰতি হৈ পৰিল |
নৈ পাৰে পাৰে কহুঁৱা বোৰ
আবেলিৰ বতাহত নাচি আছিল
দূৰৈৰ কোনো নামঘৰত ,
দবা কাঁহৰ পবিত্ৰ শব্দ |
গৰখীয়া ল'ৰাৰ বাঁহীত
চিনাকি সুৰ |
গোসাঁই ঘৰত আইৰ সন্ধ্যাৰ প্ৰাৰ্থনা
ধূপ ধূনাৰ সুবাস সেমেকা মলয়া বতাহত |
হঠাত্ , এজাক ৰাং কুকুৰৰ নিনাদ |
আকাশ বতাহ কঁপাই পদূলিৰে পাৰ হৈ গ'ল
গিৰিপ গাৰাপ কিছু অচিনাকি শব্দ |
গাৱঁৰ সীমাত এজাক ক'লা মানুহ |
গাঁৱলৈ ধুমুহা আহিছে
বাৰুদৰ ধুমুহা |
তিনিআলিটো তেনেই উকা |
উতনুৱা ডেকাৰ হাঁহিবোৰ আৰু নাই
মৰিশালী দৰে ঘৰবোৰ নিজান |
মহাজনৰ ঘৰৰ ৰাং কুকুৰে জাকে
লৈ ফুৰিছে হত্যাকাৰীৰ সংবাদ |
নিমিষতে জ্বলিছে এটি এটি ঘৰ
লেলিহান জুইত ৰাঙলী হ'ল ৰাতিৰ আকাশ
তৰাবোৰ জ্বলি আছিল সাক্ষী হৈ ,
নৈ খন বৈ আছিল জ্বলা মানুহ বুকুত লৈ |
ৰাং কুকুৰ জাকে মাথো আৰ্তনাদ কৰিছিল
মৃত্যুৰ ভয়ত |
আৰু ক'লা মানুহৰ দলটো দৌৰিছিল
হাতত বাৰুদ লৈ |
© ৰাজু কলিতা
18/10/14
